Білім күні – жаңа бастамаларға жол ашқан жарқын мереке
1 қыркүйек – Білім күні мектебімізде ерекше көңіл-күймен аталып өтті. Жаңа оқу жылының басталуына орай ұйымдастырылған салтанатты жиынға мектеп ұжымы, оқушылар, ата-аналармен қатар, білім ордасының қалыптасуы мен дамуына өз үлесін қосқан мектеп ардагерлері де арнайы қатысты.
Ұстаздық жолын абыроймен атқарып, талай шәкірттің жүрегіне білім нәрін сепкен ардагер ұстаздарға құрмет көрсетіліп, олардың еңбегі мен мектеп тарихындағы орны ерекше атап өтілді. Ұрпақ тәрбиесіне ғұмырын арнаған аға буын өкілдерінің ақ батасы мен ізгі тілектері жаңа оқу жылын бастаған оқушыларға үлкен рухани қолдау болды
Салтанатты жиынның ең толқынысты сәттерінің бірі – мектеп табалдырығын алғаш аттаған 5 «А», 5 «Ә», 5 «Б» сынып оқушыларын таныстыру болды. Жаңа оқу жылында білім ордасының үлкен шаңырағына қосылған жас өрендерге мектеп өміріне сәтті бейімделіп, білім мен өнерде биіктерден көрінуіне тілектер айтылды. Ұстаздар қауымы бесінші сынып оқушыларын білімге құштар, ізденімпаз әрі мектептің белсенді мүшелері болуға шақырды.
Салтанатты жиында Қазақстан Республикасының Мемлекеттік Туын көтеру мәртебесі мектеп мақтаныштары – Қоқан Фатима мен Зекіш Мейірбекке берілді. Мемлекеттік рәмізге деген құрмет – Отанға деген сүйіспеншіліктің, елдік сана мен азаматтық жауапкершіліктің көрінісі.
Жаңа оқу жылының басталғанын білдіретін дәстүрлі Алғашқы қоңырау да ерекше әсерлі өтті. Қоңырауды мектеп бітіруші 11-сынып оқушылары мен білім ордасына жаңадан келген 5-сынып оқушылары бірге соғып, жаңа оқу жылына символдық түрде жол ашты. Бірі – мектеппен қоштасуға жақындаған түлектер, бірі – үлкен мектеп өміріне енді қадам басқан жас өрендер. Бұл сәт ұрпақтар сабақтастығының жарқын көрінісіне айналды.
Мерекелік жиын барысында оқушыларға кітап оқудың маңызы да ерекше атап өтілді. 11-сынып оқушылары 5-сынып оқушыларына «Кітап – білім бұлағы» челленджін табыстады. Бұл бастама жас өрендерді кітап оқуға қызықтырып, білім мен рухани дамудың негізі – сапалы әдебиет екенін насихаттауға бағытталды.
Іс-шара барысында еліміздің білім беру ұйымдарындағы тәрбие жұмысының маңызды бағыттарына да назар аударылды. Атап айтқанда, «Адал азамат» біртұтас тәрбие бағдарламасы аясындағы құндылықтар кеңінен таныстырылды. Бағдарлама Мемлекет басшысының «Адал азамат – адал еңбек – адал табыс» қағидатымен үндесіп, өскелең ұрпақтың бойында адалдық, еңбекқорлық, отаншылдық, жауапкершілік пен азаматтық ұстанымды қалыптастыруға бағытталған.
Сонымен қатар, тәрбие жұмысындағы маңызды бағыттардың бірі – «Заң және тәртіп» құндылығы атап өтілді. Бұл бағыт оқушылардың құқықтық сауаттылығын арттыруға, заңды құрметтеуге, қоғамдық тәртіпті сақтауға және өз іс-әрекетіне жауапкершілікпен қарауға тәрбиелеуді көздейді.
Білім күні – өткен мен бүгінді жалғап, болашаққа бағдар беретін ерекше мереке. Бұл күні мектеп ардагерлерінің өнегелі жолы мен қазіргі ұстаздардың еңбегі сабақтасып, мектеп табалдырығын жаңа аттаған 5-сынып оқушылары мен білім ордасымен қоштасуға дайындалып жүрген 11-сынып оқушылары бір шаңырақ астында тоғысты.
Жаңа оқу жылы – жаңа білім, жаңа мақсаттар мен жаңа мүмкіндіктердің бастауы. Барша оқушыларымызға сәттілік, ұстаздарымызға шығармашылық табыс, ата-аналарымызға береке мен қуаныш тілейміз!
Білім күні құтты болсын! Жаңа оқу жылымыз жарқын жетістіктерге толы болғай!
